એ જી ગુરુજી ગાઈએ મોરારનો મહિમા – દાસી જીવણ
એ જી ગુરુજી ગાઈએ મોરારનો મહિમા – દાસી જીવણ
એ જી ગુરુજી ગાઈએ મોરારનો મહિમા – દાસી જીવણ
જીવણ કહે કામણ કરી ગયું કોઈ – દાસી જીવણ
વેલેરી કરજો મારી વાર શામળિયા – દાસી જીવણ
પ્રેમ કટારી આરંપાર‚ નીકસી મેરે નાથકી… દાસી જીવણ – મુગટલાલ જોષી
પ્રેમ કટારી આરંપાર‚ નીકસી મેરે નાથકી‚
ઓર કી હોય તો ઓખદ કીજે‚ હે હરિ કે હાથકી…
પ્રેમ કટારી આરંપાર…૦
ચોધારીનો ઘાવ ન સૂઝે જોજો ઈ કોણ જાતકી !
આંખ વીંચી ઉઘાડી જોયું‚ વાર ન લાગી વાતકી…
પ્રેમ કટારી આરંપાર…૦
સઈ ! મેં જોયું શામળા સામું‚ નિરખી કળા નાથકી‚
વ્રેહ ને બાણે‚ પ્રીતે વીંધ્યા‚ ઘાવેડી બહુ ઘાતકી…
પ્રેમ કટારી આરંપાર…૦
ઓખદ બુટી પ્રેમની સોઈ‚ જો પીવે કોઈ પાતકી‚
રાત દિવસ ઈ રંગમાં ખેલે‚ એવી રમતું હે રઘુનાથકી…
પ્રેમ કટારી આરંપાર…૦
દાસી જીવણ ભીમ પ્રતાપે‚ મટી ગઈ કુળ ભાતકી
ચિતડાં હેર્યાં શામળે વાલે‚ ધરણીધરે ધાતકી…
પ્રેમ કટારી આરંપાર…૦
કલેજા કટારી રે‚ વ્રેહની કટારી રે… દાસી જીવણ – દાવાભાઇ પાનવાળા
કલેજા કટારી રે વ્રેહની કટારી રે‚
હે માડી ! મુંને માવે‚ લઈને મારી રે મારી…
વાંભુ ભરી મુજને મારી‚ વાલે મારે બહુ બળકારી‚
એણે હાથુંથી હુલાવી રે…
માડી ! મુંને માવે લઈને મારી…૦
કટારીનો ઘા છે કારી‚ વાલીડે મારી છે ચોધારી‚
ભીતર ઘા બહુ ભારી રે…
માડી ! મુંને માવે લઈને મારી…૦
જડી બુટી ઓખદ મૂળી‚ કેની એ ન લાગે કારી‚
વૈદ ગિયા હારી રે‚ હકીમ ગિયા હારી રે…
માડી ! મુંને માવે લઈને મારી…૦
વ્રેહ તણી વેદના ભારી‚ ઘડીક ઘરમાં ને ઘડીક બારી
મારી મીટુંમાં મોરારી રે…
માડી ! મુંને માવે લઈને મારી…૦
દાસી જીવણ ભીમને ભાળી‚ વારણાં લઉં વારી વારી‚
આજ દાસીને દીવાળી રે‚ ખબરું લીધી હમારી રે…
માડી ! મુંને માવે લઈને મારી…૦
સાયાંજીને કે’જો રે‚ આટલી મારી વિનતી… દાસી જીવણ
સાયાંજીને કે’જો રે‚ આટલી મારી વિનતી રે‚
ઓલ્યા ધુતારાને કે’જો રે‚ મારા પાતળિયાને કે’જો રે‚ આટલી મારી વિનતી રે જી‚
ઓલ્યા ખેધીલાને કે’જો રે‚ મારા વાદીલાને કે’જો રે‚ આટલી મારી વિનતી રે જી‚
જઈને કે’જો‚ આટલો મારો રે સંદેશ…
મારા સાયાંજીને કે’જો રે‚ આટલી મારી વિનતી રે…૦
દાસી છે તમારી રે‚ દરશન કારણ દુબળી રે‚
ઈ દાસીને દરશન દેજો રે હમેંશ…
મારા સાયાંજીને કે’જો રે‚ આટલી મારી વિનતી રે…૦
જેને વિતી હોય તે જાણે રે‚ પરવિતી શું જાણે પ્રીતડી ? રે જી‚
કુંવારી શું જાણે રે પિયુજી તણો વિજોગ…
મારા સાયાંજીને કે’જો રે‚ આટલી મારી વિનતી રે…૦
પિયુજીને મળવા રે‚ ચાલો સખીયું શુનમાં રે જી‚
સરવે સાહેલી‚ પહેરી લેજો ભગવો ભેખ…
મારા સાયાંજીને કે’જો રે‚ આટલી મારી વિનતી રે…૦
જાળીડાં મેલાવો રે‚ ગુરુ ગમ જ્ઞાનનાં રે જી‚
ઈ જાળીડાં જરણા માંહેલા છે રે જાપ…
મારા સાયાંજીને કે’જો રે‚ આટલી મારી વિનતી રે…૦
ભીમ ગુરુ શરણે રે‚ દાસી જીવણ બોલીયા રે જી‚
દેજો અમને તમારા રે ચરણોમાં વાસ…
મારા સાયાંજીને કે’જો રે‚ આટલી મારી વિનતી રે…૦
દેખંદા રે કોઈ આ દિલમાં ય ઝણણણણ… દાસી જીવણ – ઝાલરી – હેમંત ચૌહાણ
દેખંદા રે કોઈ આ દિલ માં ય‚
નિરખંદા રે કોઈ આ દિલ માં ય‚
પરખંદા રે કોઈ આ દિલ માં ય…
ઝણણણ ઝણણણ ઝાલરી વાગે…
બોલે બોલાવે સબ ઘટ બોલે‚ સબ ઘટમાં ઈ તો રહ્યો રે સમાય‚
જિયાં જેવો તિયાં તેવો‚ થીર કરીને થાણા દિયા રે ઠેરાય…
ઝણણણ ઝણણણ ઝાલરી વાગે…
નવ દરવાજા નવી રમત કા‚ દસમે મોલે ઓ દેખાય‚
સોઈ મહેલમાં મેરમ બોલે‚ આપું ત્યાગે ઓ ઘર જાય…
ઝણણણ ઝણણણ ઝાલરી વાગે…
વિના તાર ને વિણ તુંબડે‚ વિના રે મુખે ઈ તો મોરલી બજાય‚
વિના દાંડીએ નોબતું વાગે‚ વિના રે દીપકે જ્યોત જલાય…
ઝણણણ ઝણણણ ઝાલરી વાગે…
આ રે દુ કાને દડ દડ વાગે‚ કર વિન વાજાં અહોનિશ વાય‚
વિના આરિસે આપાં સૂજે‚ એસા હે કોઈ વા ઘર જાય…
ઝણણણ ઝણણણ ઝાલરી વાગે…
જાપ અજપા સો ઘર નાંહી‚ ચંદ્ર સૂરજ જહાં પહોંચત નાંહી‚
સૂસમ ટેક સે સો ઘર જાવે‚ આપે આપને દિયે ઓળખાય…
ઝણણણ ઝણણણ ઝાલરી વાગે…
અખર અજીતા મારી અરજ સુણજો‚ અરજ સુણજો એક અવાજ‚
દાસી જીવણ સત ભીમના શરણાં‚ મજરો માની લેજો ગરીબનવાજ…
ઝણણણ ઝણણણ ઝાલરી વાગે…
દયા કરીને મું ને પ્રેમે પાયો‚ મારી નેનુંમાં આયા નૂર પ્યાલો મેં… દાસી જીવણ – રામ ભગત‚ પોરબંદર
દયા કરીને મું ને પ્રેમે પાયો‚ મારી નેનુંમાં આયા નૂર‚
પ્યાલો મેં પીધેલ છે ભરપૂર…
પ્યાલો મેં પીધેલ છે ભરપૂર…૦
નુરત સુરતની સાન ઠેરાણી‚ બાજત ગગનાંમેં તૂર રે‚
રોમે રોમે રંગ લાગી રિયો તો‚ નખ શીખ પ્રગટયા નૂર…
પ્યાલો મેં પીધેલ છે ભરપૂર…૦
સ્થાવર જંગમ જળ સ્થળ ભરિયો‚ ઘટમાં ચંદા ને સૂર રે‚
ઘટોઘટ માંહી રામ રમતા બિરાજે‚ દિલ હીણાંથી રિયો દૂર…
પ્યાલો મેં પીધેલ છે ભરપૂર…૦
ભાવે પ્રીતે જેને પૂરા નર ભેટયા વરસત નિરમળ નૂર રે‚
જે સમજ્યા ગુરુની સાનમાં ભર્યા રિયા ભરપૂર…
પ્યાલો મેં પીધેલ છે ભરપૂર…૦
ભીમ ભેટયા ને મારી ભ્રમણા ભાંગી હરદમ હાલ હજૂર રે‚
દાસી જીવણ સત ભીમના શરણાં‚ પીતાં થઈ ચકચૂર…
પ્યાલો મેં પીધેલ છે ભરપૂર…૦
એવા દોરંગા ભેળા રે નવ બેસીએ… દાસી જીવણ
એવા દોરંગા ભેળાં રે નવ બેસીએ
એ જી એમાં પત રે પોતાની જાય રે હાં…
એવા દોરંગા ભેળા રે નવ બેસીએ….૦
ઘડીકમાં ગુરુ ને ઘડીકમાં ચેલકા રે જી‚
ઘડીમાં પીર રે થઈને પૂજાય રે હાં…
એવા દોરંગા ભેળા રે નવ બેસીએ….૦
ઘડીકમાં રંગ ચડે‚ ઘડીકમાં ઊતરે રે જી‚
અને ઘડીકમાં ફટકિયાં થઈને ફૂલાય રે હાં…
એવા દોરંગા ભેળા રે નવ બેસીએ….૦
ઘડીક ઘોડે ને ઘડીક પેગડે રે જી‚
ઘડીમાં વાટુંના વેરાગી બની જાય રે હાં …
એવા દોરંગા ભેળા રે નવ બેસીએ….૦
કામી‚ ક્રોધી ને લોભી‚ લાલચુ રે‚
એ જી ઈ તો પારકે દુઃખે ન દુખાય રે હાં…
એવા દોરંગા ભેળા રે નવ બેસીએ….૦
દાસી રે જીવણને ભીમ ગુરુ ભેટિયા રે જી‚
ગુરુ મળ્યે લખ રે ચોરાશી ટળી જાય રે હાં…
એવા દોરંગા ભેળા રે નવ બેસીએ….૦
અમારા અવગુણ રે ગુરુજીમાં ગુણ તો ઘણા.. દાસી જીવણ – મુળાભગત
અમારા અવગુણ રે ગુરુજીના ગુણ ઘણા… – (જેઠીરામના નામાચરણ સાથે દાસી જીવણની રચના – દેવા ગઢવી)
અમારા રે અવગુણ રે ગુરુજીના ગુણ ઘણા રે ;
ગુરુજી ! અમારા અવગુણ સામું મત જોય….
અમારામાં અવગુણ રે….૦
ગુરુજી મારો દીવો રે‚ ગુરુજી મારો દેવતા રે ;
ગુરુજી ! મારા પારસમણીને રે તોલ…
અમારામાં અવગુણ રે….૦
ગુરુજી મારા ગંગા રે‚ ગુરુજી મારા ગોમતી રે ;
ગુરુજી અમારા કાશી અને છે કેદાર…
અમારામાં અવગુણ રે….૦
ગુરુ મારા ત્રાપા રે‚ ગુરુજી મારા તુંબડાં રે ;
ઈ તુંબડીએ અમે ઊતરિયે ભવપાર…
અમારામાં અવગુણ રે….૦
જાળીડાં મેલાવો રે ગુરુ ગમ જ્ઞાનનાં રે ;
ઈ જાળીડાં જરણાં માંહેલો છે જાપ…
અમારામાં અવગુણ રે….૦
ભીમ ગુરુ શરણે રે દાસી જીવણ બોલીયા રે ;
દેજે અમને સંતચરણમાં વાસ…
અમારામાં અવગુણ રે….૦